Retroviaxe á Casa do Patrón (Lalín)

Onte desfrutamos dunha xornada moi especial na Casa do Patrón, en Lalín, onde puidemos facer unha auténtica viaxe ao pasado para descubrir como vivían os nosos devanceiros.

Ao longo da visita percorremos o museo etnográfico, coñecendo antigos oficios, ferramentas, costumes e tradicións da vida rural galega. Foi unha experiencia moi interesante que nos permitiu comprender mellor como era a vida antigamente e valorar todo o que temos hoxe en día.

Ademais, participamos en diferentes obradoiros nos que elaboramos pan e queixo de maneira artesanal, descubrindo de primeira man o traballo e os procesos que se realizaban antigamente nas casas e aldeas.

Tamén gozamos dunha fermosa ruta de sendeirismo rodeados de natureza, compartindo xogos, conversas e momentos moi especiais cos compañeiros e compañeiras.

Sen dúbida, foi un día cheo de aprendizaxes, experiencias e convivencia que nos axudou a coñecer mellor as nosas raíces, tradicións e cultura.

Día das Letras Galegas

O pasado venres, celebramos o Día das Letras Galegas cunha fermosa xornada de convivencia co CEIP As Bizocas.

Comezamos a mañá compartindo xogos no patio. Como anfitrións, o noso alumnado preparou diferentes actividades para realizar cos nenos e nenas do mesmo curso de Bizocas, creando momentos de diversión, colaboración e novas amizades.

Despois, desfrutamos da nosa música tradicional coa actuación de “5 en Zocas”, na que tamén participaron alumnas e mestras do noso cole, enchendo o patio de música, baile e tradición galega.

Para rematar a xornada, e antes de despedir aos nosos amigos e amigas de Bizocas, cantamos xuntos a canción “Somos os Mecos do Grove”, poñendo o broche final a un día moi especial.

Durante toda a semana tamén estivemos descubrindo a figura de Begoña Caamaño, homenaxeada este ano no Día das Letras Galegas, achegándonos á súa vida e á súa obra a través de diferentes actividades realizadas na aula.

Foi unha celebración chea de convivencia, cultura e orgullo pola nosa lingua.

Lectoras do mes de abril

Na nosa biblioteca seguimos celebrando o gusto pola lectura e recoñecendo ao alumnado que participa activamente nas actividades lectoras do centro.

Este mes, as lectoras destacadas son:

Daniela, de 2º de Educación Primaria
Eva, de 3º de Educación Primaria

Como cada mes, tamén nos deixan as súas recomendacións literarias, que xa podedes descubrir e consultar na biblioteca do cole.

Parabéns ás dúas polo seu interese, entusiasmo e amor polos libros!

Grazas a todo o alumnado por participar e seguir facendo da nosa biblioteca un lugar cheo de historias, aventuras e imaxinación.

Semana do Libro: Mitos da Antiga Grecia

O Día do Libro chegou ao cole cargado de literatura con moita Historia! O alumnado de 2º de Primaria achegou a mitoloxía grega aos seus compañeiros e compañeiras, a través de diferentes actividades.

Convertéronse en narradores para contar "Os 12 traballos de Hércules" nun contacontos dirixido aos compañeiros de Infantil e 1º de Primaria, que seguiron con atención as fazañas do heroe grego.

Ademais, aproveitamos a ocasión para gravar unha versión exprés de "Os 12 traballos de Hércules" na radio escolar e probar esta ferramenta tan chula.

Ao alumnado de 3º a 6º de primaria, propuxéronlle un reto creativo: elaborar cómics baseados en tres relatos clásicos ben coñecidos: Perseo e Medusa, Teseo e o Minotauro e A caixa de Pandora. Os cómics que elaboraron os maiores xa están expostos no corredor de saída ao patio para que todos poidan ver o gran traballo que fixeron os compañeiros.

As actividades permitiron non só afondar na riqueza da cultura clásica, senón tamén fomentar o traballo colaborativo entre os diferentes niveis do centro e potenciar a expresión oral e escrita de xeito lúdico.

Foi unha xornada fantástica para fomentar a lectura, a creatividade e a colaboración entre diferentes niveis a través destas historias clásicas.

Graciñas a todos os participantes polo seu esforzo e implicación nesta xornada literaria!

Día das Artes Galegas: convertémonos en fotógrafos!

O pasado 1 de abril celebramos o Día das Artes Galegas, adicado este ano ao fotógrafo galego José Suárez, considerado un dos fotógrafos máis importantes da historia de Galicia. A súa obra destacou por retratar a vida cotiá das persoas, especialmente do mundo mariñeiro e rural galego.

En homenaxe a el, durante unha semana convertémonos en auténticos fotógrafos e fotógrafas. Nos recreos da biblioteca saímos polo patio coas tablets para realizar fotografías inspiradas na fotografía etnográfica, retratando escenas da nosa vida diaria no cole: os xogos, os compañeiros e compañeiras, os momentos compartidos e os recunchos do patio.

Foi unha experiencia moi divertida e especial, na que aprendemos a mirar o noso entorno con outros ollos, igual que facía José Suárez nas súas fotografías.

Aquí podedes ver os resultados do noso obradoiro fotográfico:

Semana do Libro - Día do Libro no Auditorio de O Grove

Con motivo do Día do Libro o pasado 23 de abril, o alumnado de Infantil, 1º e 2º de Educación Primaria gozou dunha actividade moi especial no Auditorio de O Grove.

Asistimos á representación teatral de Pedra de Cartón, que nos trouxo unha divertida versión de Carapuchiña Vermella. A través do teatro, o alumnado puido achegarse á literatura doutro xeito, desfrutando dunha historia coñecida chea de humor, emoción e sorpresas.

Foi unha actividade moi enriquecedora para celebrar o Día do Libro e seguir fomentando o gusto pola lectura tamén desde as artes escénicas.

Unha mañá para lembrar!

Semana do Libro - Contacontos con Manuel Pombal

Onte participamos nunha actividade moi especial na nosa biblioteca: un contacontos con Manuel Pombal, organizado pola Biblioteca Municipal do Grove.

Ao longo da sesión, Manuel fíxonos viaxar a través de historias cheas de imaxinación, humor e emoción. Pequenos e maiores gozamos dun tempo máxico no que as palabras cobraron vida.

Esta experiencia serviunos tamén para lembrar que, cada vez que abrimos un libro, iniciamos unha viaxe extraordinaria cara novos mundos, personaxes e aventuras.

Sen dúbida, foi unha experiencia inesquecible que nos anima a seguir descubrindo o pracer da lectura.

Semana do libro - Visita do historiador Bruno Padín

Con motivo da Semana do Libro, tivemos a sorte de recibir no noso centro a visita do historiador Bruno Padín.

Durante a sesión, compartiu con nós parte da historia da nosa vila, amosándonos imaxes e explicándonos como vivían as xentes do Grove noutras épocas. Foi unha actividade moi interesante, que nos permitiu coñecer mellor o noso entorno e as nosas raíces.

Esta visita enmárcase dentro do noso PDI "Retroviaxe", xa que nos axudou a afondar no pasado da nosa contorna.

Ademais, tivemos a oportunidade de que nos asinase o seu libro Entre o mar e a terra. Unha historia das xentes do Grove, que xa formaba parte da biblioteca do centro.

Moitas grazas, Bruno, pola túa visita e por compartir connosco o teu coñecemento.

Lectoras do mes de marzo

As lectoras do mes de marzo xa recibiron os seus diplomas e os seus agasallos! 

As elixidas foron Alba, de 1º de Educación Primaria, e Sofía, de 3º de Educación Primaria. Noraboa ás dúas polo seu interese pola lectura e pola súa participación na biblioteca!

Déixannos tamén as súas recomendacións lectoras, que podedes atopar na biblioteca para que todos e todas as poidades desfrutar.

Animádevos a participar no concurso do lector e lectora do mes e a seguir descubrindo novas historias.