O xadrez chega á nosa biblio!

A pasada semana o alumnado tivo a oportunidade de iniciarse no apaixonante mundo do xadrez grazas á visita de José Manuel Prol Lusquiños, do Club Xadrez Cum Laude.

Desde os máis pequenos de 5 anos ata o alumnado de 6º de Primaria participaron nesta experiencia, na que puideron coñecer as pezas, os movementos básicos e algunhas estratexias deste xogo tan especial.

Ao longo das sesións, os nenos e nenas comprobaron que o xadrez non é só un xogo de mesa, senón tamén unha actividade que axuda a desenvolver habilidades como a concentración, a memoria, o razoamento lóxico e a capacidade para tomar decisións. Ademais, tamén promove valores como a paciencia, o respecto polo rival e o compañeirismo.

A través de pequenos retos e partidas adaptadas á súa idade, o alumnado participou con moito interese e curiosidade, descubrindo un deporte que permite aprender mentres se xoga.

Queremos agradecer a José Manuel a súa visita e o seu entusiasmo á hora de achegar o xadrez ao noso alumnado.

Lectora e lector do mes de febreiro

Na nosa biblioteca seguimos celebrando o gusto pola lectura. Este mes queremos felicitar aos lectores do mes de febreiro polo seu entusiasmo e interese polos libros.

A nosa lectora do mes é Yara, de 2º de Educación Primaria, e o lector do mes é Martiño, de 3º de Educación Primaria. Parabéns aos dous! 

Como é tradición, tamén quixeron compartir co resto de compañeiros e compañeiras as súas recomendacións lectoras, eses libros que máis lles gustaron e que animan a descubrir na biblioteca.

- Yara recoméndanos o libro Dila Crocodila - Espremer os miolos, de Ana Gómez.

- Martiño recoméndanos Las aventuras del capitán Calzoncillos - Esta vez a todo color, de Dav Pilkey.

Animamos a todo o alumnado a participar no concurso de lectores do mes da biblioteca, a visitar a biblio para descubrir as novidades lectoras e, por suposto, a darlle unha oportunidade aos libros recomendados por Yara e Martiño.

A lectura sempre nos leva a novas aventuras!

8 de marzo, Día Internacional da Muller

O pasado luns celebramos o Día Internacional da Muller cunha actividade moi especial na que participou todo o alumnado.

Ao longo da mañá realizamos unha actividade cooperativa entre todas as clases na que viaxamos pola Historia para descubrir o importante papel das mulleres en cada época.

Neste curso de Retroviaxe, mediante unha divertida gymkana, o alumnado tivo que resolver retos, ordenar pistas e reflexionar sobre a importancia do papel da muller na sociedade, dende as primeiras comunidades da Prehistoria ata a Idade Contemporánea.

Durante esta viaxe pola Historia coñecemos historias inspiradoras como:

• o liderazgo de Cleopatra

• a filosofía de Hipatia de Alexandría

• a valentía de María Pita

• e o traballo de Clara Campoamor, que loitou para que as mulleres puidesen votar.

Entre probas, reflexións e traballo en equipo, aprendemos algo moi importante:

As mulleres sempre tiveron un papel fundamental na Historia.

Seguimos educando cada día para promover a igualdade, o respecto e a xustiza.

Podedes ver o vídeo da actividade na cosa conta de Instagram:

Gymkana 8M

Semana da prensa - Titulares tolos!

Con motivo da Semana da Prensa, no cole realizamos unha actividade moi creativa chamada “Titulares tolos”.

Partindo de xornais reais, o alumnado converteuse por un momento en auténticos xornalistas… pero con moita imaxinación!

Primeiro manipulamos os xornais, observando as distintas seccións e recortando palabras e fragmentos de titulares que nos chamaban a atención. Despois, con todos eses recortes, creamos os nosos propios titulares tolos, combinando palabras para inventar noticias sorprendentes, divertidas e moi orixinais.

Por último, cada un ilustrou o seu titular inventado, realizando un debuxo relacionado coa noticia creada e empregando papel de xornal como base para o traballo.

O resultado foi unha colección de titulares cheos de humor, creatividade e imaxinación que nos permitiu achegarnos ao mundo da prensa dunha maneira lúdica e artística.

 

Obradoiro de maquillaxe de Entroido

Durante a semana previa ao Entroido vivimos días cheos de diversión e creatividade. Ademais de gozar cos tradicionais mandadiños da meca, as profes da biblioteca organizaron un obradoiro de maquillaxe de Entroido durante os recreos.

Foron momentos moi especiais nos que nos axudamos uns aos outros: compañeiros e compañeiras, maiores e pequenos, compartindo pinturas, ideas e moitas risas mentres decorabamos as nosas caras, uñas e cabelos.

Este obradoiro converteuse nun espazo de encontro e colaboración, onde o máis importante non foi só maquillarse, senón compartir, coidar e desfrutar xuntos.

Unha actividade divertida que nos preparou para vivir o Entroido con máis ilusión ca nunca! 

Entroido 2026

O pasado 13 de febreiro celebramos no cole o noso agardado desfile de Entroido, unha xornada chea de cor, música e moita ilusión.

Este ano o Entroido estivo moi ligado ao noso PDI, xa que cada clase se disfrazou da etapa da Historia que está a traballar durante este curso. Foi unha maneira moi divertida de aprender e de compartir co resto do cole todo o que estamos descubrindo.

Desfilamos, bailamos e gozamos moitísimo vendo a creatividade e o esforzo de cada grupo. As familias tamén puideron acompañarnos neste día tan especial.

Para rematar a celebración, xuntámonos todos e todas para bailar a canción "Tataravoa" de Fillas de Cassandra, porque ao estudar a Historia decatámonos da importancia das nosas raíces e do valor das persoas maiores, que gardan a memoria do pasado.

Foi un día para lembrar… e para seguir facendo historia xuntos!

No seguinte enlace podedes ver un pequeno vídeo do noso desfile:

Día da Muller e da Nena na Ciencia

Con motivo do Día Internacional da Muller e da Nena na Ciencia o pasado 11 de febreiro, no noso centro realizamos diferentes actividades para poñer en valor o papel fundamental das mulleres no ámbito científico ao longo da historia.

Traballamos en equipo investigando sobre científicas como Margarita Salas, pioneira na bioloxía molecular; Sara García Alonso, investigadora biomédica e candidata a astronauta; e Antonia Ferrín Moreiras, astrónoma galega e referente na nosa terra.

Ademais, achegámonos á mesa de exposición temática para buscar información sobre moitas outras mulleres científicas que, co seu esforzo e talento, contribuíron a cambiar o mundo en ámbitos como a medicina, a física, a química, a enxeñaría ou a tecnoloxía.

Este día lémbranos a importancia de visibilizar referentes femininos na ciencia, fomentar vocacións científicas entre as nenas e avanzar cara a unha sociedade máis igualitaria.

Porque a ciencia tamén é cousa de nenas. 

Telexornal de Conmeniño, un ano máis!

Un ano máis, o Telexornal de Conmeniño volveu ás aulas da man do alumnado de 4º, que se converteu en auténtico equipo de xornalistas. Ao longo do proxecto foron entrevistando a todas as clases do centro para averiguar que etapa da historia están a estudar este curso.

Ademais, cada grupo explicou como teñen decorada a porta da súa aula e a relación desa decoración co proxecto traballado, dando lugar a un percorrido moi creativo e cheo de aprendizaxe pola historia.

Podedes velo na seguinte ligazón:

TELEXORNAL

Parabéns a todos e en especial ao alumnado de 4º polo seu traballo, a súa implicación e por achegarnos a información dun xeito tan divertido e interesante. 

Lector e lectora do mes de xaneiro!

Xa temos aos gañadores do lector do mes de xaneiro na nosa biblioteca escolar. Parabéns a Lucía de 4º EP e a Thiago de 1º EP, que demostraron un gran entusiasmo pola lectura e moitas ganas de descubrir novas historias. 

Ademais, xa podedes atopar na biblioteca as recomendacións de libros feitas polos lectores do mes. Son historias que lles gustaron especialmente e que quixeron compartir con todos vós.

Non dubidedes en achegarvos, ler tamén estes libros e gozar das súas aventuras tanto como eles. A lectura sempre é unha boa compañía!

Día da Paz e da Non Violencia

Hoxe, 30 de xaneiro, celebramos no centro o Día da Paz e da Non Violencia, unha xornada para reflexionar sobre a importancia do respecto, a convivencia e a resolución pacífica dos conflitos.

O alumnado de 6º de Primaria foi o encargado de ler un manifesto, compartindo con todos e todas unha mensaxe de paz e, solidariedade e compromiso cun mundo máis xusto.

Para pechar o acto, cantamos xuntos unha canción pola paz, na que participou todo o alumnado do centro, creando un ambiente de unión, respecto e convivencia, e reforzando a importancia de traballar estes valores de maneira conxunta.

Seguimos a traballar cada día valores que constrúen unha escola máis respectuosa e solidaria.

Lecturas para o Día da Paz

Achégase o Día Escolar da Non Violencia e da Paz, que celebramos cada 30 de xaneiro, e desde o equipo da biblioteca preparamos, como cada ano, unha mesa temática cunha selección de libros.

A través destas lecturas queremos achegar ao alumnado valores como o respecto, a empatía, a solidariedade, a convivencia pacífica e a resolución dialogada dos conflitos. Os libros axúdannos a pensar, a sentir e a aprender a construír un mundo máis xusto e pacífico.

Animámosvos a achegarvos a esta selección, a lelos e a compartilos. Porque a paz tamén se aprende lendo.

Lector e lectora do mes de decembro

No noso cole seguimos apostando pola lectura como unha das mellores formas de aprender e desfrutar. Por iso queremos recoñecer o esforzo e a ilusión de dous alumnos que destacaron polo seu compromiso cos libros durante o mes de decembro.

A lectora e lector do mes de decembro son:

• Valeria, de 3º de Educación Primaria

• Dylan, de 2º de Educación Primaria

Ambos demostraron constancia, interese pola lectura e ganas de descubrir novas historias. Parabéns aos dous polo voso traballo!

Desde aquí queremos animar a todo o alumnado a seguir participando nas actividades lectoras do centro, a visitar a biblioteca e a deixarvos levar polos libros. Cada páxina lida é un paso máis nunha gran aventura.