Estamos moi ilusionadas de anunciar que xa deu comezo unha nova aventura lectora no nosa biblioteca! Neste curso 25/26, o Club de Lectura conta coa participación do alumnado de 3º, 4º e 5º de Primaria e... o grupo de 2º que se uniu sobre a marcha!
Como primeira actividade, os nosos pequenos lectores e lectoras puxeron a proba toda a súa creatividade deseñando o logo e o nome oficial do club. As propostas reflicten á perfección a ilusión coa que iniciamos este proxecto!
Nos próximos días descubriremos con que libros imos comezar a traballar. Seguro que serán lecturas cheas de aventuras, misterio e emocións que nos farán desfrutar e aprender xuntos.
Agardamos que este sexa un ano cheo de páxinas por descubrir, personaxes inesquecibles e moitas ganas de ler. O Club de Lectura 25/26 acaba de comezar... e promete ser unha experiencia marabillosa!
Hoxe tivemos a segunda sesión do Club de Lectura de 3º de Primaria, e foi todo un éxito. Para dar inicio a esta nova aventura, organizamos un pequeno xogo de pistas no que o alumnado tivo que poñer a proba a súa intuición, a súa atención e, por suposto, as súas ganas de ler.
Cada pista levounos un pasiño máis preto de descubrir o primeiro libro que traballaremos este curso no club. O título escollido é Somos os monstros, da autora galega Paula Carballeira. Unha obra de teatro chea de imaxinación, humor e reflexións sobre o medo, a identidade e a amizade. Estamos seguras de que vai dar moito xogo nas próximas sesións!
Agardamos seguir disfrutando destas pequenas xuntanzas lectoras que fan medrar a curiosidade, o gusto pola lectura e a ilusión por compartir historias.
O club de lectura xa está en marcha… e promete ser monstruosamente divertido!
Unha vez coñecido o libro, chegou o momento de dar identidade ao noso club. Entre todos e todas propuxemos diferentes ideas para escoller un nome e crear un logo que nos representase. Deste xeito, sentimos que formabamos parte da creación do club e que este era un proxecto construído por todo o grupo.
Nas semanas seguintes mergullámonos na lectura da obra de teatro "Somos os monstros", de Paula Carballeira. Pouco a pouco fomos descubrindo a historia, coñecendo ás súas personaxes e interpretando os seus diálogos. A lectura compartida permitiunos gozar da obra dunha maneira moi especial, poñendo voz a cada personaxe e dando vida ás escenas como auténticos actores e actrices.
Ao rematar a lectura, puxemos en marcha a nosa imaxinación. Inspirándonos no libro, inventamos unha nova personaxe para a historia: o noso propio monstro. Reflexionamos sobre o seu aspecto, os seus gustos, a súa personalidade e tamén sobre os seus medos, comprendendo que, igual que lles ocorre aos protagonistas da obra, todos temos fortalezas e inseguridades que forman parte de nós.
Para pechar esta experiencia realizamos un traballo colaborativo por equipos. A través dunha actividade artística, decoramos ao Monstro Grande utilizando pequenos anacos de papel de cores, creando unha obra colectiva na que cada persoa achegou a súa parte para construír un resultado común.
Ao longo destes meses, o club de lectura converteuse nun espazo para compartir lecturas, expresar ideas, traballar en equipo, desenvolver a creatividade e descubrir o pracer de ler xuntos. Ademais de coñecer unha magnífica obra teatral, aprendemos que os libros poden ser unha porta aberta á imaxinación, á reflexión e á convivencia.
Foi unha experiencia moi enriquecedora que nos deixou grandes momentos, moitas aprendizaxes e, sobre todo, ganas de seguir compartindo novas aventuras lectoras nos vindeiros cursos.
As bruxas: unha lectura chea de aventuras dentro e fóra das páxinas
Este curso, o alumnado de 5.º de Primaria mergullouse na lectura de As bruxas, de Roald Dahl, unha historia que nos permitiu vivir moitas aventuras e descubrir que un libro pode dar pé a experiencias moi diferentes, todas elas relacionadas coa imaxinación, a creatividade e o traballo en equipo.
A medida que avanzabamos na lectura, fomos comentando os diferentes acontecementos da historia e reflexionando sobre os seus personaxes. Unha das actividades que máis nos fixo pensar foi a elaboración dun mural en lembranza dos nenos e nenas desaparecidos a causa das bruxas. Nel recollemos os seus nomes e ilustramos as súas historias, convertendo esta proposta nunha maneira de recordar aqueles personaxes que, aínda sendo ficticios, forman parte da aventura narrada por Roald Dahl. Ademais de traballar a comprensión lectora, esta actividade axudounos a analizar a importancia de cada personaxe dentro da obra e a expresar artisticamente o que a lectura nos transmitía.
Unha vez rematada a novela, chegou o momento de comparala coa súa adaptación cinematográfica. Vimos a película e, entre todos e todas, analizamos as principais diferenzas entre ambas versións. Comentamos as escenas que non aparecen na película, os cambios introducidos nalgúns personaxes e o distinto final da historia. Este intercambio de opinións permitiunos comprobar que unha mesma obra pode contarse de formas diferentes e que a lectura ofrece, en moitas ocasións, unha experiencia máis completa e rica en detalles.
Outra das novidades deste curso foi a posta en marcha da radio escolar, e o Club de Lectura tivo a oportunidade de estrear este novo recurso coa gravación dun podcast dedicado a As bruxas. Nel compartimos recomendacións, impresións sobre a lectura e as nosas opinións acerca dos momentos máis sorprendentes da historia. Foi unha experiencia moi enriquecedora, na que aprendemos a preparar un guión, organizar as intervencións, expresarnos con claridade diante do micrófono e traballar de maneira colaborativa para conseguir un produto final do que nos sentimos moi orgullosos.
Como broche final desta aventura literaria, realizamos unha saída a Baiona, onde relacionamos a lectura coa navegación, un elemento moi presente na historia. Durante a visita embarcámonos nunha actividade na que, entre lendas e historias de bruxas, nos convertimos en auténticos exploradores na procura destes misteriosos personaxes. Esta experiencia permitiunos trasladar a lectura ao mundo real, descubrindo o patrimonio marítimo da nosa contorna ao tempo que deixabamos voar a nosa imaxinación.
Con todas estas actividades comprobamos, unha vez máis, que ler é moito máis que pasar páxinas. Cada libro pode abrir a porta a novas aprendizaxes, experiencias compartidas e momentos inesquecibles. As bruxas acompañounos durante boa parte do curso e deixounos grandes recordos, demostrando que as mellores historias continúan vivindo moito tempo despois de rematar a súa lectura.
No 2º curso de Educación Primaria, o Club de Lectura foi unha experiencia inesquecible que deixou unha gran pegada nos pequenos grandes lectores.
Durante este curso escolar con tanta Historia, mergullámonos na lectura de mitos clásicos da Antiga Grecia. Pandora, Perseo e Medusa, Hércules, Teseo e o minotauro... Heroinas, heroes e criaturas mitolóxicas que abriron unha porta á imaxinación e nos deixaron unha chea de aprendizaxes.
Despois de cada lectura, fixemos un debate sobre ela, poñendo en común as partes da historia que máis nos gustaran e comentando as características das personaxes, analizando os seus comportamentos.
O Día do Libro organizamos un contacontos para os máis pequenos, aos que lles contamos a historia de "Os 12 traballos de Hércules". Dado o éxito experimentado, decidimos gravar a narración na radio, para que nos escoitasen as familias. Foi unha experiencia chulísima!
Un final de curso para compartir: convivencia, lingua e lectura
Como peche das actividades deste curso, o alumnado do Club de Lectura participou nunha xornada moi especial de convivencia xunto ao CEIP As Bizocas, unha experiencia que nos permitiu volver compartir a lectura, a lingua e a cultura galega con outros compañeiros e compañeiras.
A mañá comezou cun encontro entre o alumnado dos dous centros, no que puidemos coñecernos mellor e participar en diferentes xogos tradicionais, recuperando formas de lecer de antes e poñendo en valor o noso patrimonio cultural. Foi unha oportunidade para aprender, colaborar e divertirse nun ambiente de convivencia e respecto.
Durante a xornada tamén gozamos da actuación do grupo 5 en Zocas, do que forman parte varios alumnos e alumnas do noso Club de Lectura. A súa música encheu de alegría o encontro e puxo de manifesto a importancia de seguir mantendo vivas as nosas tradicións a través da música popular galega.
Como broche desta convivencia, todos os participantes unímonos para interpretar e bailar a canción "Somos os mecos do Jrove", unha actividade promovida polo Equipo de Dinamización da Lingua Galega. A través da música compartimos un mesmo sentimento de pertenza, amizade e orgullo pola nosa lingua, convertendo este momento nun dos máis emotivos da xornada.
A celebración continuou coa participación no Correlingua, en Pontevedra, unha iniciativa que reúne cada ano milleiros de escolares arredor da defensa e promoción da lingua galega. Antes da saída, o alumnado elaborou diferentes carteis nos que quixo expresar a importancia da lectura como ferramenta para manter viva a nosa lingua, destacando que cada libro lido en galego contribúe a conservar, enriquecer e transmitir o noso patrimonio cultural ás novas xeracións.
Ningún comentario:
Publicar un comentario