CLUB DE LECTURA 24-25

 Benvidas e benvidos ao noso Club de Lectura!

Este ano, con moita ilusión,  sumamos un novo proxecto a nosa biblioteca, un Club de Lectura, e estamos moi orgullosas e orgullosos de presentárvolo, aínda que... hoxe soamente foi o comezo. 

Agora toca poñerse mans á obra, crear un logo, buscar o libro que queremos ler... así que vos iremos contando e ensinando por aquí cando teñamos  novas noticias.

 

O alumnado participante son as nenas e os nenos de 3º e 4º curso. Por aquí vos iremos deixando unhas imaxes das actividades que vamos realizando. No primeiro encontro, elaboramos o logo e buscamos un nome que resepresentase o noso Club de Lectura:

  

 

Logo, fixemos unha votación do logo gañador e este foi o resultado:

 

Os libros escollidos no primeiro trimestre foron: "Meu irmán o xenio" de Rodrigo Muñoz Avia e "Somos os monstros" de Paula Carballeira.


- Presentación "Somos os monstros" de Paula Carballeira e "Meu irmán o xenio" de Rodrigo Muñoz Avia

Para presentar os libros, presentouselle ao alumnado  un xogo de pistas para atopar o libro na biblioteca do centro. 

Unha vez atopados, continuose cunha actividade que consistía en facer un deseño diferente da portada de dito libro.

A continuación vanse ir deixando recollidas un pequeno resumo das actividades que se levaron a cabo tendo como base os distintos libros:

"Meu irmán o xenio"

Aproveitando a lectura, fixemos unha actividade centrada no benestar emocional. Inspirámonos no personaxe protagonista e fixémonos unha pregunta: en que somos xenios nós mesmos?

Moitas veces é fácil fixarse no que non se nos dá ben, pero nesta ocasión decidimos poñer o foco nos nosos puntos fortes, nos talentos que cada un de nós posúe, por pequenos que parezan.

Durante a actividade:

• Compartimos en grupo aquelas cousas que se nos dan ben ou que nos fan sentir orgullosos de nós mesmos.

• Fixemos unha especie de mural ou nube de palabras coas nosas “xenialidades”: desde saber escoitar, ata debuxar, escribir historias, facer rir aos demais ou ter moita imaxinación.

• Falamos de como recoñecer e valorar estas capacidades mellora a nosa autoestima e nos axuda a sentirnos mellor connosco mesmos e cos demais.

Foi unha experiencia moi enriquecedora, onde todos aprendemos algo novo sobre nós e sobre os compañeiros. Meu irmán o xenio serviunos como punto de partida para descubrir que todos, dalgunha maneira, temos algo de xenios.

 

Actividade artística: “Debuxando o libro”
Noutra sesión, puxémonos creativos. Nun papel continuo colocado na biblioteca, cada persoa escolleu unha escena ou momento do libro e representouna con debuxos. Pintamos entre todos e creamos un mural colectivo que agora decora o noso espazo de lectura.

Houbo ilustracións de escenas emotivas, momentos divertidos e imaxes que quedaron gravadas na nosa memoria como lectores. Esta actividade foi unha maneira diferente de conectar coa historia, poñendo en xogo a imaxinación e a expresión artística.

 

 

"Somos os monstros"

- Representación da 1ª escena

Comezouse coa presentación dos personaxes ademais da lectura e proba de representación da primeira escena. A esta actividade únese tamén a realización dun marcapáxinas, que axudará a pautar a lectura sesión a sesión. 

- Representación da 2ª e 3ª escena

Comézase xa coa segunda escena, facendo por suposto un repaso da primeira xa traballada. Xunto a isto, dase unha sesión a maiores onde o alumnado deseñou un contrato coas normas para poder participar no Club de lectura.

- Representación da 4ª e 5ª escena

Continuamos con dúas escenas máis e chega o momento de darlle un pouco de realidade a estás representacións, como? Deseñando os nosos antefaces de Monstro grande e Monstro pequeno, uns dos personaxes. Gústavos?

 

- Continuamos coas representacións

"Somos os monstros" deu a posibilidade de xogar moito, poñendo voces, correndo, saltando... E así o vivimos en cada unha das representacións nas sesións do Club de lectura.

- Agora si,  "Nós" Somos os monstros

Como peche da lectura de Somos os monstros, chegou o momento de transformarnos en Monstro Grande e Monstro Pequeno.

Disfraces literarios no club de lectura

No club de lectura decidimos facer unha actividade diferente: disfrazámonos dos nosos libros favoritos. Cada un de nós escolleu un personaxe ou escena que lle gustase moito e preparou un disfraz relacionado coa súa lectura preferida.

Foi un día moi divertido onde compartimos os nosos libros e personaxes favoritos, ademais de pasalo ben xuntos.

Aquí está a foto dos nosos disfraces literarios. Como podedes ver, a nosa biblioteca estivo chea de personaxes de contos, aventuras e moita imaxinación.Novo trimestre, nova aventura: comezamos con Escarlatina, a cociñeira defunta

No club de lectura da biblioteca escolar arrancamos o segundo trimestre cun libro cheo de sabor, misterio e moito humor: Escarlatina, a cociñeira defunta, de Ledicia Costas. Unha historia que mestura maxia, cociña e un toque moi peculiar... do máis alá.

Esta lectura promete levarnos a un mundo subterráneo cheo de personaxes incribles, receitas pouco habituais e situacións disparatadas que nos farán rir, sorprendernos... e quen sabe se tamén abrir o apetito.

Nestes primeiros encontros:

• Comezamos a coñecer aos protagonistas e as súas primeiras aventuras.

• Compartimos primeiras impresións e hipóteses sobre o que pode pasar.

• Fixemos algunha que outra reflexión sobre a morte, o humor e a imaxinación na literatura.

Finalizamos a lectura cunha receita, interdisciplinarmente coa área de inglés: 

 

 

 

 

Canta, miña compañeira: Unha xornada de convivencia con ritmo, tradición e amizade

Este trimestre, o noso club de lectura tivo a sorte de ler Canta, miña compañeira, un libro que nos mergullou na historia, na música e na forza das mulleres galegas a través das cantareiras. Unha lectura que encaixa perfectamente co espírito das Letras Galegas, coa tradición oral e co poder da cultura compartida.

Para celebralo, vivimos unha xornada moi especial de convivencia co club de lectura do CEIP As Bizocas. Foi un encontro cheo de emoción, onde a lectura saíu das páxinas para converterse en música, movemento e comunidade.

Durante esta xornada:

• Falamos do libro e do legado das cantareiras na nosa cultura.

• Cantamos, tocamos e bailamos todos xuntos unha canción tradicional galega, sentindo a forza da unión e da tradición.

• Reflexionamos sobre o valor da música como forma de expresión, de resistencia e de celebración colectiva.

Foi unha experiencia inesquecible onde, máis alá da lectura, compartimos vivencias, risos e emocións, mantendo viva a memoria e o espírito das cantareiras galegas que tanto teñen contribuído á nosa identidade.

“Canta, miña compañeira” converteuse así nunha chamada a seguir cantando, a seguir unidas e unidos arredor da nosa lingua e das nosas raíces.

Peche do Club de Lectura: unha despedida con agarimo e reflexión

O noso Club de Lectura chegou ao final deste curso cun encontro moi especial. Durante os últimos meses, o alumnado participante compartiu lecturas, emocións e ideas, descubrindo o pracer de ler en compañía e creando un espazo de diálogo e imaxinación.

Na última sesión, quixemos agradecerlles a súa implicación cun pequeno detalle simbólico, recoñecendo así o compromiso, a constancia e o entusiasmo que amosaron en cada encontro. Ademais, completaron unha pequena enquisa para valorar a súa experiencia no club: o que máis lles gustou, o que aprenderon e mesmo propostas para mellorar nas vindeiras edicións.

Foi un momento de celebración, pero tamén de reflexión e despedida. Grazas a todos e todas por formar parte desta viaxe literaria. Xa estamos desexando volver encontrarnos con novas lecturas e novas aventuras o curso que vén.