Obradoiro de decoracións de Samaín na biblio

 

Obradoiro de decoracións de Samaín na biblio

Ao longo desta semana e da próxima, o noso alumnado está a participar no obradoiro de decoracións de Samaín durante os recreos na biblioteca. Esta actividade está a converterse nun espazo creativo no que os nenos e nenas poden dar renda solta á súa imaxinación decorando para esta celebración tan especial.

Os grupos de terceiro foron os primeiros en estrear o obradoiro e deron exemplo co seu traballo e ilusión. Hoxe sumáronse novos participantes, que continuaron enchendo a biblio de pantasmas, morcegos, cabazas e moita maxia terrorífica!

Aquí vos deixamos algunhas imaxes dos momentos vividos no obradoiro onte e hoxe. Mirade que artistas temos no cole!

Primeiros momentos na biblio

 

Primeiros momentos na biblio

Ao longo deste mes, o alumnado de Infantil de 3 anos estivo a descubrir a nosa biblioteca escolar.

Foron entrando, coñecendo o espazo, aprendendo onde están os contos, como se coidan os libros e tamén descubrindo os xogos e recunchos que poden atopar nela.

Houbo tempo para mirar contos, escoitar historias, xogar, compartir e ir collendo confianza neste novo espazo que pouco a pouco xa senten como propio.

Está a ser unha experiencia tranquila e moi especial, na que cada neno e nena comeza a familiarizarse cun lugar que os acompañará durante moitos anos no colexio.

Contacontos con Estefanía Padullés: Que mal día, gato Klops!

 

Hoxe tivemos a sorte de recibir no noso colexio á escritora e ilustradora Estefanía Padullés, autora do fermoso conto Que mal día, gato Klops!.

Desde Infantil de 5 anos ata 4º de Primaria, o alumnado gozou dunha mañá chea de imaxinación, risas e emocións. Estefanía contounos as aventuras do gato Klops, un gatiño que parece ter un día desastroso, ata que unha estrela cae diante do seu fuciño e todo comeza a cambiar.

A través das súas palabras e das súas ilustracións, descubrimos que mesmo os días máis malos poden rematar ben, e que sempre hai un chisquiño de luz esperando por nós. O alumnado participou con entusiasmo, comentando as ilustracións que Estefanía ía debuxando e facendo preguntas.

Ademais, a autora explicounos como crea os seus contos e debuxos, animando a todos e todas a seguir debuxando, lendo e escribindo historias.

Grazas, Estefanía, por facernos sorrir e lembrar que cada día pode ser especial!

Mochilas viaxeiras 25/26

 Ola, familias! 

Un curso máis poñemos en marcha as mochilas viaxeiras para que poidades compartir cos nenos e nenas momentos inesquecibles de lectura en familia.

Dentro de cada mochila atoparedes libros en galego, castelán e inglés; nalgúns casos inclúense tamén CDs de música ou DVDs. Ademais, incorporamos o Diario da mochila, onde o alumnado deberá recoller, segundo a proposta indicada, a lectura que máis lle gustou (con debuxos, resumos, fotos…).

Na mochila viaxa tamén unha nota informativa coas indicacións para o coidado do material e os prazos de devolución.

Agardamos que gocedes moito das lecturas e deste tempo compartido. E lembrade: podedes enviarnos fotos das vosas sesións lectoras en familia.

Grazas pola vosa implicación e participación! 

Telexornal de Conmeniño do 3º trimestre

  Benvidas e benvidos ao 3º Telexornal de Conmeniño!

Presentado por nós, o alumnado de 4º de Primaria.

Neste último trimestre fixemos un montón de actividades e queremos compartilas convosco presentando o noso proxecto final.

Non perdades detalle, que o curso remata pero as ganas de contar todo… seguen rodando! 

Último día de curso pasado por auga… e diversión!

 Despedimos o curso como máis nos gusta: xogando, rindo e compartindo momentos inesquecibles. Celebramos o último día cunha xornada chea de xogos de auga, na que non faltaron as carreiras, os chorros, os baldes e, sobre todo… ¡moita alegría!

Tanto pequenos como maiores gozaron ao máximo, nun ambiente de convivencia, festa e despedida. Un xeito refrescante e divertido de pechar un curso cheo de aprendizaxes e emocións.

Grazas a todo o alumnado por ser o corazón desta escola. Agora… a descansar e a desfrutar do verán!

 

 

 

 

Xornada de portas abertas do PDI

Rematamos o curso por todo o alto coa presentación do noso Proxecto Documental Integrado! Foi unha xornada moi especial na que contamos coa participación das familias e na que se amosou todo o traballo realizado ao longo dos últimos meses.

 En Infantil, os murais inspirados na pintura enchérono todo de cor

 En 1º, os cortometraxes creados polo alumnado deixaron a todos/as abraiados/as.

 En 2º fixemos rir coas nosas coleccións de chistes e trucos de maxia.

 En 3º representouse un conto creado e teatralizado polos nenos e nenas.

 En 4º, expuxemos unha escultura colectiva feita con material reciclado, coa colaboración das familias e coa axuda de Retha de Kock, que dende aquí queremos agradecerlle publicamente o seu traballo e disposición.

 En 5º, fixemos unha viaxe pola historia da música e tamén expuxemos o noso mercadiño Depoemprende.

 E en 6º, a fotografía foi a protagonista, cunha exposición chea de talento.

Despois, gozamos dunha merenda deliciosa grazas ás achegas das familias.

E para poñer o broche de ouro... concerto de Paco Nogueiras! Un peche de festa inmellorable que fixo bailar a pequenos e maiores!

Grazas a todos e todas por facer deste día un auténtico éxito! 💫

 

 

 

 

 

Estoxos creativos

 A pasada semana no cole demos vida a uns estoxos moi especiais: pintámolos con pintura eco-sostible!

Cada deseño é único, feito con ilusión, cores naturais e moito respecto polo medio ambiente. Pequenos xestos que fan grandes cambios!

Arte, reciclaxe e sustentabilidade van da man para coidar o planeta… e levar o material escolar con moito estilo!

 

Obradoiros de creacións artísticas

 O alumnado de 5º e 6º participou nos últimos meses en varios obradoiros de creación artística dentro do programa DepoEmprende na Escola. Durante este tempo, deseñaron e elaboraron con moita dedicación unha gran variedade de produtos: pulseiras, colgantes, chaveiros, marcapáxinas, figuras decorativas e outros pequenos tesouros feitos a man.

Neste post recollémolo todo en imaxes : os materiais, o proceso e os resultados finais das súas creacións, que este xoves levarán a Pontevedra para vender nun mercado escolar xunto a outros centros participantes.

 Todo o recadado será doado á Asociación de Enfermedades Raras, convertendo este proxecto nunha aprendizaxe solidaria e chea de valor.

 

 

 

🎬✨ Proxecto OLLARTE – 1º de Primaria

 O alumnado de 1º mergullouse no mundo do cine dentro do PDI Ollarte. Inspiráronse en Chaplin para crear dúas películas cheas de creatividade e humor. Prepararon todo: decorados, vestiario… ¡ata venderon entradas!

🎟️ As familias e o resto do alumnado asistiron á estrea en primicia, coma nun auténtico festival de cinema. Foi todo un éxito, cargado de emoción, traballo en equipo e moita ilusión.